गजलेच्या क्षेत्रातील शिवाजी म्हणून ओळख असणारे अहमदनगर जिल्ह्यातील गझलकार डॉक्टर शिवाजी काळे यांची अप्रतिम गझल रचना

भग्न मूर्ती लपवलीस तू
की विसर्जन विसरलीस तू

काय झाले अभंगा तुला
एक ओवी रडवलीस तू

सर्व काही मिळाले मला
आणि नकळत हरवलीस तू

पंख आहेत इच्छे तुला
का अशी शांत बसलीस तू

एक वादळ तुला जड कसे
ती लव्हाळी बघितलीस तू ?

साखळी तर दिसेना कुठे
मग कशाने जखडलीस तू

आब राखून मर वेदने
ज्या दिमाखात जगलीस तू

मी स्वतःच्याच आलो जवळ
दूर जेव्हा सरकलीस तू

पण इथे मात्र हरलीस तू
चक्क प्रेमात पडलीस तू

डॉ. शिवाजी काळे