स्थानिक पातळीवरील घुसमटीमुळे वर्षा कुडाळकरांचा शिंदे गट शिवसेनेला रामराम

तेंडोलीतून अपक्ष लढणार जिल्हा परिषद निवडणूक

कुडाळ –

शिवसेना शिंदे गटाच्या माजी महिला जिल्हा प्रमुख तथा ओबीसी जिल्हा प्रमुख वर्षा कुडाळकर यांनी आज पत्रकार परिषद घेऊन शिवसेनेला जय महाराष्ट्र केला. आमदार निलेश राणे यांच्याबद्दल कोणतीही नाराजी नसल्याचे स्पष्ट करत, मात्र स्थानिक पातळीवर काम करताना सतत घुसमट होत असल्याने पक्षातून बाहेर पडण्याचा निर्णय घेतल्याचे त्यांनी सांगितले.
शिंदे गटाची शिवसेना स्थापन होताना आपण जिल्ह्यातील एकमेव महिला पदाधिकारी होतो, अशी आठवण करून देत कुडाळकर म्हणाल्या की, उपविभाग प्रमुख, विभाग प्रमुख, तालुका व उपजिल्हाप्रमुख अशी विविध जबाबदारी त्यांनी प्रामाणिकपणे पार पाडली. शिंदे गटात प्रवेशानंतर कुडाळ-मालवणसह कणकवली, देवगड व वैभववाडी या पाच तालुक्यांची संघटनात्मक जबाबदारी आपल्याकडे होती आणि त्या सर्व तालुक्यांत संघटना वाढवण्याचे काम केले.
मात्र सध्याच्या परिस्थितीत संघटना वाढीसाठी आपल्याला विचारात घेतले जात नसल्याची खंत त्यांनी व्यक्त केली. “मानसिक त्रास सहन करावा लागत होता. अजून काम करायची इच्छा होती, पण संधीच मिळत नव्हती,” असे सांगत त्यांनी राजीनाम्याचे कारण स्पष्ट केले.
आगामी निवडणुकांसाठी ठरवण्यात आलेल्या फॉर्म्युलाबाबतही त्यांनी नाराजी व्यक्त केली. तेंडोली व पिंगुळी हे शिवसेनेचे बालेकिल्ले असताना या ठिकाणी भाजपला जागा सोडण्यात आल्याने आपण अस्वस्थ झाल्याचे कुडाळकर म्हणाल्या. याच कारणांमुळे आपण शिंदे गट शिवसेनेतून बाहेर पडत असून ओबीसी जिल्हा प्रमुख पदाचाही राजीनामा दिल्याचे त्यांनी जाहीर केले.
आपल्या राजकीय प्रवासात साथ देणाऱ्या सर्व कार्यकर्ते, पदाधिकारी व महिला कार्यकर्त्यांचे त्यांनी आभार मानले. कुडाळ तालुक्यातील ७८ गावांमधून शिवसेनेत प्रवेश करणारी एकमेव महिला म्हणून मिळालेल्या पाठिंब्याबद्दल त्यांनी कृतज्ञता व्यक्त केली.
दरम्यान, सध्या तरी कोणत्याही दुसऱ्या पक्षात जाण्याचा विचार नसल्याचे स्पष्ट करत, तेंडोली जिल्हा परिषद मतदारसंघातून अपक्ष म्हणून निवडणूक लढवणार असल्याची घोषणा वर्षा कुडाळकर यांनी केली.