*ज्येष्ठ कवी मोहन मराठे लिखित अप्रतिम वास्तववादी काव्यरचना..*

*”आम्हा कोण वाली”*

निवडणूकांचे सरले वारे

आश्वासनांचे उडले फवारे

पाण्यावाचून वावर खाली

नेते हो,आम्हा कोण वाली? /१/

या वाडी वर,त्या वाडी वर

होऊन गेली “सुंदोपसुंदी”

शेतामधली “मोटर जळली ”

नेते हो, आम्हा कोण वाली /२/

दिल्या आम्ही घोषणा

केले यांचे जयजयकार

खुर्ची, खुर्ची ची संगत झाली

नेते हो, आम्हा कोण वाली. /३/

पंचवार्षिक अर्थ “योजना ”

झाली आता, चिंता नको

शेतामधली पिके ही सुकली

नेते हो, आम्हा कोण वाली /४/

तोच सदरा,गुलालाचा

तीच टोपी या देशाची

प्रचार करुनी चप्पल तुटली

नेते हो, आम्हा कोण वाली /५/

सुन्न आज झाले मन हो

बळीराजाचे हे चित्र पाहूनी

आकांत करुनी,पिके पुसती

नेते हो, आम्हा कोण वाली. /६/

रचना:— मोहन मराठे.