सावंतवाडी नगरपरिषद निवडणुकीसाठी मतदान जनजागृती पदयात्रा

जिल्हाधिकारी तृप्ती धोडमिसे यांचा सहभाग

सावंतवाडी
सावंतवाडी नगरपरिषद सार्वत्रिक निवडणूक २०२५ पूर्वी नागरिकांमध्ये मतदानाबाबत जागरूकता वाढवण्यासाठी शहरात भव्य पदयात्रेचे आयोजन करण्यात आले. जिल्हाधिकारी तृप्ती धोडमिसे यांनी या पदयात्रेत सहभाग घेत मतदारांना मोठ्या संख्येने मतदान करून लोकशाही मजबूत करण्याचे आवाहन केले.

जनरल जगन्नाथराव भोसले शिवउद्यान येथून जिल्हाधिकाऱ्यांच्या हस्ते हिरवा झेंडा दाखवून पदयात्रेची सुरुवात झाली. मतदारांना आकर्षित करण्यासाठी विशेष सेल्फी स्टॅण्डचे अनावरणही करण्यात आले.

ही पदयात्रा मिलाग्रीस हायस्कूल चौक, सालईवाडा रस्ता, जयप्रकाश चौक, गांधीचौक, नगरपरिषद कार्यालय, कॉलेज रोड, रामेश्वर प्लाझा मार्गे पुन्हा शिवउद्यान येथे समारोपास आली.

श्री पंचम खेमराज महाविद्यालय, राणी पार्वती देवी हायस्कूल, ज्युनिअर कॉलेज आणि कळसुलकर इंग्लिश स्कूलच्या विद्यार्थ्यांनी आणि शिक्षकांनी उत्स्फूर्त सहभाग घेऊन ‘मतदान करा’च्या घोषणा दिल्या.

संपूर्ण पदयात्रेत जिल्हाधिकारी धोडमिसे यांनी स्वतः पायी चालत मतदारांशी संवाद साधून मतदानाचे महत्त्व पटवून दिले. यावेळी निवडणूक निर्णय अधिकारी व तहसीलदार श्रीधर पाटील, सहाय्यक निर्णय अधिकारी व मुख्याधिकारी संतोष जिरगे, वैभव कुमार अंधारे यांसह इतर प्रशासकीय अधिकारी उपस्थित होते.

हा जनजागृती उपक्रम सावंतवाडीतील मतदानाचा टक्का वाढवण्यास महत्त्वपूर्ण ठरेल, असा विश्वास व्यक्त करण्यात आला.