शिंदे शिवसेनेने नारायण राणेंचा सन्मान राखून युतीत यावे — बाबा मोंडकर

भाजपकडून १६-४ फॉर्म्युल्याचा प्रस्ताव;

नगराध्यक्षपद भाजपकडे ठेवण्याची भूमिका स्पष्ट

मालवण

मालवण मतदारसंघ हा खासदार नारायण राणे यांचा असून, शिंदे शिवसेनेचे जिल्ह्यातील अस्तित्व हे राणे व प्रदेशाध्यक्ष रवींद्र चव्हाण यांच्या नेतृत्वामुळेच निर्माण झाले आहे. त्यामुळे मित्रपक्ष शिंदे शिवसेनेने नारायण राणे यांचा सन्मान राखत भाजपच्या नेतृत्वाखालील महायुतीत १६-४ फॉर्म्युला स्वीकारून सहभागी व्हावे, असे आवाहन भाजप शहरमंडल अध्यक्ष बाबा मोंडकर यांनी पत्रकार परिषदेत केले.

हॉटेल महाराजा येथे झालेल्या पत्रकार परिषदेस भाजपचे तालुकाध्यक्ष धोंडी चिंदरकर, मंदार केणी, बाबा परब, विजय केनवडेकर, महेश मांजरेकर आदी पदाधिकारी उपस्थित होते.

श्री. मोंडकर म्हणाले, खासदार नारायण राणे यांनी पूर्वीच स्पष्ट केले आहे की जिल्ह्यातील सर्व स्थानिक स्वराज्य संस्थांचे अध्यक्ष भाजपचे असतील. त्यानुसार मालवण नगरपरिषदेचा नगराध्यक्ष देखील भाजपचाच असावा, यावर पक्षाचे शिक्कामोर्तब झाले आहे. चर्चेदरम्यान शिंदे शिवसेनेने १२ नगरसेवक आणि नगराध्यक्षपदाची मागणी केली होती, मात्र भाजपने मित्रपक्षाचा सन्मान राखत ४ जागा आणि नगराध्यक्षपद भाजपकडे ठेवण्याचा प्रस्ताव वरिष्ठांकडे मंजुरीसाठी पाठवला आहे.

मोंडकर म्हणाले, “शिंदे शिवसेनेकडे सध्या मालवणमध्ये शून्य नगरसेवक असतानाही भाजपने ४ जागा देण्याची तयारी दाखवली आहे. गेल्या २५ वर्षांचा इतिहास पाहता नारायण राणे यांनी मित्रपक्षाला दोनपेक्षा जास्त जागा दिल्या नव्हत्या. त्यामुळे तोच फॉर्म्युला कायम ठेवण्याची कार्यकर्त्यांची अपेक्षा आहे.”

भाजपकडे नगरसेवकांच्या २० जागांसाठी ५२ अर्ज आणि नगराध्यक्ष पदासाठी ८ अर्ज प्राप्त झाले आहेत. ओरोस येथे पालकमंत्री नितेश राणे, माजी आमदार प्रमोद जठार, जिल्हाध्यक्ष प्रभाकर सावंत, संघटन मंत्री शैलेंद्र दळवी यांच्या उपस्थितीत मुलाखती घेण्यात आल्या असून निवडणुकीची सर्व तयारी पूर्ण झाल्याचे मोंडकर यांनी सांगितले.

दरम्यान, चिवला बीचवरील घटनेमुळे ख्रिस्ती बांधवांच्या भावना दुखावल्या गेल्या असून, या घटनेचा भाजपने तीव्र शब्दांत निषेध केला आहे. समाजात तेढ निर्माण करणाऱ्यांवर कठोर कारवाई करण्याची मागणी करण्यात आली आहे. “मालवण हे सामाजिक सौहार्दाचे केंद्र असून, निवडणुकीच्या तोंडावर समाजात दुफळी निर्माण करण्याचा प्रयत्न यशस्वी होणार नाही,” असे मोंडकर यांनी स्पष्ट केले.

पालकमंत्री नितेश राणे यांच्याशी चर्चा करून राज्य यंत्रणेला घटनेची माहिती देण्यात आली असून, संबंधितांवर कठोर कारवाई करण्याच्या सूचना पोलीस यंत्रणेला देण्यात आल्या असल्याचे मोंडकर यांनी सांगितले.