झाडावरून पडलेल्या गंभीर जखमीला बाबुराव धुरी यांच्या पुढाकाराने ठाकरे सेनेची मदत

दोडामार्ग

दोडामार्ग शहरातील धाटवाडी परिसरात रविवारी दुपारी सुमारास १:१५ वाजता एक व्यक्ती झाडावरून पडून गंभीर जखमी झाल्याची घटना घडली. अपघाताची माहिती मिळताच ठाकरे शिवसेनेचे पदाधिकारी तात्काळ घटनास्थळी धाव घेत मदतकार्याला लागले.

धाटवाडी येथे झाडावर काम करत असताना त्या व्यक्तीचा तोल गेल्याने तो खाली पडला. अपघातानंतर जखमी व्यक्तीला जागेवरून हलता येत नव्हते आणि ती वेदनेने विव्हळत होती. घटनेची माहिती ठाकरे शिवसेना जिल्हाप्रमुख बाबुराव धुरी यांना मिळताच त्यांनी उपतालुकाप्रमुख मिलिंद नाईक व समन्वयक भिवा गवस यांना तत्काळ घटनास्थळी पाठविले. त्यांनी तातडीने १०८ क्रमांकावर संपर्क साधून रुग्णवाहिकेला पाचारण केले.

स्थानिक कार्यकर्त्यांच्या मदतीने जखमी व्यक्तीला दोडामार्ग ग्रामीण रुग्णालयात दाखल करण्यात आले असून प्राथमिक उपचारानंतर पुढील उपचारासाठी गोवा येथे हलविण्यात आले आहे. ठाकरे शिवसेनेच्या वेगवान मदतकार्यामुळे नागरिकांनी समाधान व्यक्त केले आहे.