८ नोव्हेंबरला होणार गुणवंत कामगार व यशस्वी उद्योजकांचा सन्मान
कुडाळ :
कुडाळ एमआयडीसीच्या सर्वांगीण विकासात राज्याचे उद्योगमंत्री उदय सामंत यांच्या प्रयत्नांमुळे गेल्या तीन वर्षांत तब्बल ४० कोटी रुपयांचा निधी मिळाला आहे. रस्ते, पाणी आणि वीज अशा मूलभूत सुविधांच्या उभारणीसाठी त्यांनी मोठे सहकार्य दिले आहे. विशेष म्हणजे या सर्व कामांबाबत कोणताही गाजावाजा न करता प्रत्यक्ष विकासावर भर दिला असल्याचे उद्योग क्षेत्राकडून नमूद करण्यात आले आहे.
त्यांच्या या सहकार्याबद्दल कृतज्ञता व्यक्त करण्यासाठी कुडाळ एमआयडीसी इंडस्ट्रिज असोसिएशनतर्फे शनिवारी, ८ नोव्हेंबर रोजी सकाळी ९ ते ११ या वेळेत बॅ. नाथ पै शिक्षण संस्थेच्या सभागृहात उद्योगमंत्री उदय सामंत यांच्या सत्कार समारंभाचे आयोजन करण्यात आले आहे.
असोसिएशनचे अध्यक्ष मोहन होडवडकर व सचिव नकुल पार्सेकर यांनी पत्रकार परिषदेत ही माहिती दिली. यावेळी माजी अध्यक्ष आनंद बांदिवडेकर, शशिकांत चव्हाण, कुणाल वरसकर आदी उपस्थित होते.
होडवडकर म्हणाले, “आमदार निलेश राणे यांच्या अध्यक्षतेखाली होणाऱ्या या सत्कार सोहळ्याला प्रमुख अतिथी म्हणून आमदार दीपक केसरकर, भारत विकास समूहाचे अध्यक्ष व प्रख्यात उद्योजक हणमंतराव गायकवाड, महाराष्ट्र चेंबर ऑफ कॉमर्स, इंडस्ट्रीज अँड अॅग्रीकल्चरचे अध्यक्ष रवींद्र माणगावें, तसेच ट्रस्ट बोर्ड महाराष्ट्र चेंबर ऑफ कॉमर्स, इंडस्ट्रीज अँड अॅग्रीकल्चरचे चेअरमन आशिष पेडणेकर उपस्थित राहणार आहेत.”
कार्यक्रमाची सुरुवात सकाळी ९ वाजता उद्योजक हणमंतराव गायकवाड यांच्या प्रेरणादायी मार्गदर्शनपर व्याख्यानाने होईल.
दुसऱ्या सत्रात १० वाजता उद्योगमंत्री उदय सामंत व मान्यवरांच्या उपस्थितीत दीपप्रज्वलन सोहळा पार पडेल. त्यानंतर बुजुर्ग व यशस्वी उद्योजकांचा सत्कार, तसेच गुणवंत कामगार पुरस्कार वितरण समारंभ होणार आहे. या वेळी मंत्री उदय सामंत यांचा विशेष सत्कार करण्यात येणार आहे.
जिल्ह्यातील सर्व उद्योजक आणि नवउद्योजकांनी या कार्यक्रमास मोठ्या संख्येने उपस्थित राहावे, असे आवाहन अध्यक्ष मोहन होडवडकर यांनी केले आहे.
