वाळू व बांधकाम साहित्याच्या टंचाईमुळे प्रधानमंत्री आवास योजनेतील कामे ठप्प – मोफत वाळू व मुदतवाढ देण्याची मागणी

कुडाळ :

प्रधानमंत्री आवास योजनेअंतर्गत मंजूर झालेल्या घरकुलांची कामे सुरू करण्यासाठी होत असलेला दबाव आणि घर बांधणीसाठी वाळू व चिर्‍यांची अनुपलब्धता या गंभीर समस्येकडे लक्ष वेधण्यासाठी तालुक्यातील तेंडोली येथील ग्रामस्थांनी कुडाळ तहसीलदारांना निवेदन दिले. शासनाच्या धोरणानुसार घरकुल लाभार्थ्यांना तातडीने ५ ब्रास वाळू मोफत उपलब्ध करून द्यावी, अशी आग्रही मागणी करण्यात आली.

सिंधुदुर्ग जिल्ह्यात प्रधानमंत्री आवास योजनेअंतर्गत जवळपास १० हजारांहून अधिक घरकुले मंजूर झाली आहेत. सध्या पावसामुळे आणि आवश्यक बांधकाम साहित्य, विशेषतः वाळू आणि चिरे उपलब्ध नसल्याने घरकुलांची कामे सुरू करणे लाभार्थ्यांना शक्य होत नाही. त्यामुळे ग्रामपंचायत आणि गटविकास अधिकाऱ्यांकडून कामे सुरू करण्यासाठी लाभार्थ्यांवर दबाव आणला जात असल्याने लाभार्थ्यांना अडचण निर्माण झाली आहे.

या पार्श्वभूमीवर तेंडोली ग्रामस्थांनी सरपंच सौ. अनघा तेंडोलकर, जिल्हा काँग्रेस उपाध्यक्ष मा. विजय प्रभू, उपसरपंच श्री. आकाश मुणणकर, सामाजिक कार्यकर्ते श्री. सत्यवान तेंडोलकर यांच्या नेतृत्वाखाली तहसीलदार, प्रांताधिकारी आणि गटविकास अधिकारी यांची भेट घेतली.

शासनाच्या धोरणानुसार घरकुल लाभार्थ्यांना बांधकामासाठी आवश्यक साहित्य उपलब्ध होईपर्यंत आणि पावसाळ्याच्या परिस्थितीचा विचार करून मुदतवाढ द्यावी, अशीही मागणी करण्यात आली.

निवेदन देताना गावातील पंढरीनाथ सर्वेकर, महादेव चव्हाण, कल्पना चव्हाण, गणेश तेंडुलकर, बाबू पाटकर, मेघश्याम सर्वेकर, सुधीर राऊळ आदी लाभार्थी मोठ्या संख्येने उपस्थित होते. घरकुल बांधकामातील अडचणी लक्षात घेऊन प्रशासनाने तातडीने तोडगा काढावा, अशीही ग्रामस्थांची मागणी आहे.