कर्ज व्यवहारातील गैरव्यवहार तक्रार दिल्लीतील बँक सुरक्षा व फसवणूक विभागाकडे; चौकशी आदेशामुळे खळबळ

सिंधुदुर्ग :

सिंधुदुर्ग जिल्हा मध्यवर्ती सहकारी बँकेच्या कर्ज व्यवहारातील फसवणूक प्रकरणी माजी आमदार राजन तेली यांच्यासह आठ जणांविरोधात जिल्हा बँकेने केलेल्या तक्रारीची गंभीर दखल घेतली आहे. मुंबई येथील सीबीआयच्या लाचलुचपत प्रतिबंधक शाखेचे पोलिस अधीक्षक यांनी ही तक्रार पुढील कार्यवाहीसाठी दिल्ली येथील बँक सुरक्षा व फसवणूक विभागाकडे (BS&F) पाठविली आहे. त्यामुळे या प्रकरणाला नवीन वळण लागले आहे.

ही तक्रार जिल्हा बँकेचे व्यवस्थापक विश्वनाथ दोरलेकर यांनी दाखल केली होती. त्यात कर्जाच्या रक्कमांचा गैरवापर झाल्याचा ठपका ठेवण्यात आला आहे. सन २०२१ ते २०२२ या कालावधीत हे व्यवहार झाल्याचे नमूद करण्यात आले आहे.

या प्रकरणी माजी आमदार राजन तेली यांच्यासह प्रथमेश राजन तेली, सर्वेश राजन तेली, प्रदीप मनोहर केरकर, शैलजा एम. सिंगबाळ, सीमा महेश सबनीस, राजन कृष्णा तेली, रुजिता राजन तेली आणि सुनील कृष्णा निरवडेकर अशा कर्जदारांवर आरोप करण्यात आले आहेत.

जिल्हा बँकेच्या कर्ज विभागाने दाखल केलेल्या तक्रारीनुसार या सर्वांनी कर्जरकमेचा चुकीच्या पद्धतीने वापर केला. त्यानंतर सीबीआय, लाचलुचपत प्रतिबंधक शाखा, मुंबई यांनी २२ सप्टेंबर २०२५ रोजी पत्राद्वारे चौकशीचे आदेश काढले आहेत. या घडामोडीमुळे सिंधुदुर्गात मोठी खळबळ उडाली आहे.