सावंतवाडी :
गणपती बाप्पा मोरया, पुढच्या वर्षी लवकर या..!! च्या जयघोषात येथील पोलिस ठाण्यातील गणपतीचे १९ दिवसांनी मोठी तलावात थाटामाटात विसर्जन करण्यात आले. यावेळी ढोल ताशांचा गजर, बँजोचा नाद अन् पोलिसांचा उत्साह विसर्जन मिरवणुकीत खास आकर्षण ठरला.
सण, उत्सवात नेहमी गस्तीत असणारे पोलिस आज बेशभान होऊन नाचले. लाईट्सच्या झगमगाटात बाप्पांची विसर्जन मिरवणूक निघाली. फुलांनी सजवलेल्या रथातून निघालेली बाप्पांची स्वारी विशेष आकर्षण ठरली. सावंतवाडी पोलिस ठाणे येथे हा बाप्पा १९ दिवसांसाठी विराजमान होतो. पोलिस अन् पोलिसांच्या कुटुंबांकडून या गणरायाची सेवा केली जाते. इतर सर्व गणपतींचं विसर्जन झाल्यानंतर व २१ दिवसांच्या गणरायाला निरोप देण्यापूर्वी या गणपतीचे १९ व्या दिवशी विसर्जन होते.
पोलिस ठाण्यातून विसर्जन मिरवणुकीला प्रारंभ झाला. यावेळी पोलिसांसह त्यांचे कुटुंबीय ढोल पथकाच्या तालावर थिरकत असल्याचे दृश्य होते. बँजो, ढोल ताशांच्या गजरात गणरायाला निरोप देण्यात आला. गणपती बाप्पा मोरया, पुढच्या वर्षी लवकर या…!! अशा जय घोषाने यावेळी आसमंत दुमदुमून गेला होता. गणरायाला निरोप देण्यासाठी पोलिसांसह मोठ्या संख्येने नागरिकही मोठी तलावकाठी उपस्थित होते.
