आंबोली घाटात ब्रेक फेल झाल्याने टेम्पो दरीत कोसळला : चालक सुखरूप

सावंतवाडी :

नागपूरहून गोवा येथे पावडर घेऊन जाणाऱ्या एका आयशर टेम्पोचा आंबोली घाटात भीषण अपघात झाला. घाटातील नाना पाणी वळणावर ब्रेक निकामी झाल्याने हा टेम्पो तब्बल १०० फूट खोल दरीत कोसळला. सुदैवाने, या अपघातात टेम्पो चालक सुमित दत्ताजी उजवे (वय ३४, रा. नागपूर) किरकोळ जखमी झाला असून त्याचा जीव बचावला आहे. ही घटना आज दुपारी घडली.

नागपूरहून गोव्याकडे निघालेला हा टेम्पो (एमएच-३१/एफसी-१४५३) आंबोली घाटातून जात असताना नाना पाणी वळणावर अचानक त्याचे ब्रेक फेल झाले. चालकाने नियंत्रण मिळवण्याचा प्रयत्न केला, परंतु तोपर्यंत टेम्पोने दरीच्या दिशेने वेग घेतला आणि तो थेट १०० फूट खोल दरीत कोसळला. टेम्पोमधून पावडरच्या गोण्या खाली विखुरल्या गेल्या.

अपघाताची माहिती मिळताच स्थानिक ग्रामस्थ आणि पोलिसांनी तातडीने घटनास्थळी धाव घेतली. स्थानिक लोकांच्या मदतीने चालकाला दरीतून बाहेर काढण्यात आले. त्याला किरकोळ दुखापत झाली असली तरी तो सुखरूप आहे. या घटनेमुळे घाटातील वाहतुकीवर कोणताही परिणाम झाला नाही. अधिक तपास पोलीस करत आहेत.