*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री सौ. मंजिरी अनसिंगकर लिखित अप्रतिम अभंग रचना*

🌹आगमन श्री गणेशाचे🌹

गणेश चतुर्थी|भाद्रपद मासी

स्थापू गणेशासी| आनंदाने||—–१

ओंकार स्वरूप|पार्थिव रूपात|

आले आकारात| गणेशाचे||—-२

उत्साह अमाप| लहान थोरांचा|

स्पर्श चैतन्याचा| घरादारा||—-३

सुंदर मखर| छान सजावट|

मनोहारी थाट|श्री बाप्पाचा||—-४

शमी नि जास्वंद|ताजे दुर्वांकूर|

अर्पावा शेंदूर| श्री गणेशा||—-५

भक्तीभाव मोठा| मनोभावे पूजा|

खूप गाजावाजा| हेरंबाचा||—-६

मोदक नी लाडू|ठेवा नैवेद्यास|

अर्पा गणेशास| मोदभरे||——-७

सकाळ सांजेला| आरती बाप्पाची| अनन्य भावाची| गणराया—-८

दिस भारलेले| श्रद्धेचे भक्तीचे|

आणि मांगल्याचे| परिसरी——९

चौसष्ट कलांचा|तूच अधिपती|

हे गणाधिपती,| भालचंद्रा||—-१०

प्रार्थिते मंजिरी| श्री गजाननाला|

सुख सकलांना| द्यावे दाता—-११

सौ.मंजिरी अनसिंगकर नागपूर.