सिंधुदुर्गात मटका-जुगारावर धाड; आता दारू, गांजा व वाळू माफियांचा नंबर

कणकवली :

काल कणकवलीतील मटका जुगार अड्ड्यावर आम्ही धाड टाकली. आता अवैध दारू धंदे, अमली पदार्थांचे अड्डे, वाळू माफिया यांच्यावर कारवाईचा नंबर आहे. सर्व अवैध धंदे बंद न झाल्यास आम्ही दर आठवड्याला धाडसत्राची ब्रेकिंग न्यूज देणार आहोत. तसेच या अवैध धंद्यांना पाठबळ देणारे पोलीस अधिकारी असो महसूल अधिकारी असोत किंवा अन्य शासकीय कर्मचारी या सर्व शासकीय अधिकाऱ्यांना आम्ही सस्पेंड करणार आहोत. यामुळे अवैध धंद्यांना पाठबळ देणाऱ्या शासकीय अधिकाऱ्यांची वेळेच सावध व्हावे असा इशारा पालकमंत्री नितेश राणे यांनी आज येथे दिला.

येथील प्रहार भवन मध्ये श्री. राणे यांनी पत्रकार परिषद घेतली. ते म्हणाले, मी पालकमंत्री पदाचा पदभार घेतल्यानंतर लगेचच जिल्ह्यातील मटका, जुगार, गांजा या अड्ड्यांवर कारवाई करावी असे निर्देश पोलीस प्रशासनाला दिले होते. त्यासाठी मी नऊ महिन्याची संधी दिली. पण पोलीस प्रशासन कारवाई करत नसल्याने मला धाड टाकावी लागली.

राणे म्हणाले, सावंतवाडी रेस्ट हाऊसच्या मागे सिगारेट मधून कोण गांजा विकतोय, कोण कोण गांजा आणत आहेत. खारेपाटण चेकपोस्ट, कणकवलीतील हरकुळ बु्दुक किंबहुना जिल्ह्यातील सर्वच भागात अवैध धंद्यांमध्ये कोण कोण सहभागी आहेत. या व्यावसायिकांना जिल्ह्यातील प्रशासकीय यंत्रणा कशी साथ देते याची सर्व माहिती माझ्याकडे आहे. एवढेच नव्हे तर मीडियातील कुणाकुणाचे अवैध व्यावसायिकांशी लागेबांधे आहेत. याचीही मला माहिती आहे. वेळ आल्यावर या सर्वांवर आम्ही कारवाई करणार आहोत.

राणे म्हणाले, मी जिल्ह्यातील मटका, जुगार, गांजा या अवैध धंद्यावर कारवाई करा असे निर्देश जिल्हा प्रशासनाला दिले होते. त्यावेळी मला हस्तां मिळत नाही. हस्तां वाढवून पाहिजे असे अनेक आरोप झाले. पण मी गप्प राहिलो कारण पोलिसांना कारवाईची संधी द्यायची होती. पण पोलिसांनी कारवाई केली नसल्याने मला धाड टाकावी लागली. काल मटका अड्ड्यावर धाड टाकली आणि प्रत्येक आठवड्याला सर्व अवैध व्यवसायांवर धाडसत्र टाकून ते व्यवसाय कायमचे बंद करून टाकणार आहे.

राणे म्हणाले, सिंधुदुर्गातील स्थानिक गुन्हा अन्वेषण विभाग, पोलीस, महसूल आणि इतर विभाग काय काय करतात. वाळू चोरी, गांजा, गोवा बनावटीची दारू यांना कोण पाठबळ देतंय हे सर्व माहिती आहे. मी सगळ्यांना कारवाईसाठी वेळ देतोय. त्यांनी कारवाई करावी. कोणी सस्पेंड झाला तर मला दोष देऊ नका. नारायण राणे यांनी आपल्या कारकिर्दीत तरुणांना सुरक्षित ठेवले. व्यसनांच्या आहारी जाऊ दिले नाही. त्यांचा मी मुलगा आहे हे सर्व अवैध व्यावसायिकांनी लक्षात ठेवावे. पालकमंत्री, पत्रकार आणि इतर सर्व शासकीय यंत्रणांनी आपली भूमिका स्पष्ट पार पाडायला हवी. अन्यथा युवा पिढी बिघडल्याशिवाय राहणार नाही. हे सर्व थांबविण्याची जबाबदारी तुमची आमची सर्वांची आहे.