अवयवदानासाठी कणकवलीत जनजागृती रॅलीचे आयोजन

कणकवली

रक्तदानासारखेच अवयवदान हेही जीवनदानाचे श्रेष्ठ रूप असून, याबाबत अजूनही पुरेशी जनजागृती नसल्याने फेडरेशन ऑफ ऑर्गन अँड बॉडी डोनेशन महाराष्ट्र, रोटरी क्लब कणकवली, ज्येष्ठ नागरिक सेवा संघ, पेन्शनर्स असोसिएशन यांच्या संयुक्त विद्यमाने कणकवली शहरात अवयवदान जनजागृतीसाठी रॅलीचे आयोजन करण्यात आले.

या रॅलीत देहदान, नेत्रदान, त्वचादान व अवयवदानाचे महत्व सांगण्यात आले. “नेत्रदान करा, अंधांना प्रकाश दाखवा”, “अवयव जपा, मृत्यूनंतर दान करा”, “मरावे परी अवयवरूपी उरावे” अशा घोषणा देत विद्यार्थ्यांनी आणि सहभागी सदस्यांनी जनजागृती केली.

या उपक्रमात रोटरी क्लबचे अध्यक्ष ॲड. राजेंद्र रावराणे, डॉ. विद्याधर तायशेटे, प्रमोद लिमये, मेघा गांगण, रमेश मालवीय, राजश्री रावराणे, ॲड. दीपक अंधारी, महिंद्र मुरकर, गुरु पावसकर, नितीन बांदेकर, संतोष कांबळे, ज्येष्ठ नागरिक सेवा संघाचे आबा मराठे, राजस रेगे, पेन्शनर्स असोसिएशनचे प्रा. हरिभाऊ भिसे, अनुप्रिया रेगे, रिमा भोसले, भोसले सर, तसेच आयडियल स्कूलचे विद्यार्थी आणि शिक्षक मोठ्या संख्येने उपस्थित होते.

यावेळी डॉ. विद्याधर तायशेटे आणि प्रमोद लिमये यांनी अवयवदानाचे महत्व आणि त्याची प्रक्रिया यावर सखोल मार्गदर्शन केले. जनजागृतीसाठी अशा उपक्रमांची गरज असल्याचे यावेळी वक्त्यांनी नमूद केले.