*जागतिक साहित्य कला व्यक्तित्व विकास मंचच्या सन्मा. सदस्या ज्येष्ठ लेखिका कवयित्री राधिका भांडारकर लिखित अप्रतिम काव्यरचना*

अनुष्टुभ छंद

*नश्वर*

देह जातो अभंगात्मा

तो न जळे कधी कसा

देहपूजा कशाला ती

आत्म्याचे सुख जाणशी १

धावतो मी फुकाचा रे

कशास ना मला कळे

वाटले जे मिळाले ते

सारे होते क्षणातले… २

संचियेले धनाला मी

अडकलो सुखावलो

अचंबित कितीवेळा

तरी नाही निवांतलो..३

जगलो मी स्वत:साठी

चौकटीत अरुंदित

विसरलो निरंताला

जे खरे ते अखंडित..४

राधिका भांडारकर