हळदीचे नेरूर येथे वन्यप्राण्याचा हल्ला

एका म्हैशीचा मृत्यू, तीन अद्यापही बेपत्ता

कुडाळ
कुडाळ तालुक्यातील सह्याद्री पर्वतरांगांमध्ये वसलेल्या हळदीचे नेरूर या गावात आत्माराम शिवराम नाईक यांच्या जनावरांच्या कळपावर वन्यप्राण्याने हल्ला केला. या हल्ल्यात एका म्हैशीचा मृत्यू झाला असून, एक जनावर गंभीर जखमी झाले आहे तर तीन जनावरे अद्यापही बेपत्ता आहेत.

२१ जुलै रोजी ही घटना घडली असून, नाईक कुटुंबीय व स्थानिक ग्रामस्थांनी बेपत्ता जनावरांचा शोध घेतला आहे. मृत म्हैशीवर व गंभीर जखमी जनावरावर पशुवैद्यकीय अधिकाऱ्यांनी पंचनामा केला आहे.

ग्रामस्थांचा दावा आहे की हल्ला वाघाने केला, मात्र वनविभागाने या दाव्याला विरोध करत सांगितले की या भागात वाघ नाहीत, आणि हल्ला बिबट्याने केला असावा. वनक्षेत्रपाल संदीप कुंभार यांनी माहिती दिली की नुकसानग्रस्त पशुपालकांना पंचनाम्यानुसार नुकसानभरपाई दिली जाईल.

या घटनेमुळे हळदीचे नेरूर परिसरात भीतीचे वातावरण पसरले असून, शेतकऱ्यांनी या वन्यप्राण्याच्या बंदोबस्ताची मागणी केली आहे.