*जागतिक साहित्य कला व्यक्तित्व विकास मंच तथा लालित्य नक्षत्रवेल समूहाच्या सन्मा सदस्या ज्येष्ठ लेखिका कवयित्री सौ.मंजिरी अनसिंगकर लिखित अप्रतिम अभंग रचना*

*जय हनुमान*

सूर्योदय काळी| चैत्र पौर्णिमेला|

जन्म हो जाहला| हनुमान—-१

जन्मताच केले| आकाशी उड्डाण|

सूर्यफळ जाण| हनुमान—२

अंजनी केसरी| पुत्र हा दोघांचा,|

शिवशंकराचा| अवतार—-३

रामाचा हा भक्त|आहे सर्वश्रेष्ठ|

भाव एकनिष्ठ| रामपदी—–४

दास्यभक्ती त्याची| आदर्श जगती|

ठेवा ऐसी भक्ती| प्रभुपदी—-५

बुद्धिमंता मध्ये| आहे तो वरिष्ठ|

जितेंद्रिय श्रेष्ठ| हनुमान—–६

वायुसम वेग| पवनसुताचा|

नेता वानरांचा| हनुमान—७

शक्तीची देवता|पूजन करावे|

“रूईस” वहावे|अर्चनेसी—-८

सदैव हृदयी| सियावर राम|

मुखी राम नाम| हनुमान—-९

मंजिरी विनवे|पवनसुतासी|

शक्ती सकलांसी| दे लढाया—-१०

जय हनुमान| बजरंग बली|

जय शक्तीशाली| वंदन हो—११

सौ.मंजिरी अनसिंगकर नागपूर