*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री प्रा सौ सुमती पवार लिखित अप्रतिम काव्यरचना*

*तू किती ग सुंदर आहे…*

तू किती ग सुंदर आहे, तू किती ग सुंदर आहे

जीवनाचा रंगमंच हा, तू मंदिर केले आहे

तू किती ग सुंदर आहे…

लखलखती तू गगन दामिनी सळसळ करत येते

डोळे दिपती तुला ग पाहून लगेच परतून जाते

सहस्रधारा जणू गारवा तू तर अनंत आहे…

तू किती ग सुंदर आहे…

निळी जांभळी गगन शलाका इंद्रधनूचे रूप

पहाट होता धुके बनूनी, उतरते अलगद

दरवळणारा धूप पहाटे तू तर सुगंध आहे..

तू किती ग सुंदर आहे…

पहाटवेळी बनून लाली घुंघट ओढून घेते

किरणांचा तो रथ धुक्यावर ढगपालखी होते

अरूणाचा तो गुलाल फासत अस्फूट हासत राहे

तू किती ग सुंदर आहे..

प्रा.सौ.सुमती पवार नाशिक

(९७६३६०५६४२)