*सुंदरवाडीचे सुपुत्र रंगकर्मी श्री सतीश पाटणकर लिखित “जाऊ तिथे खाऊ” आणि “कोकणातील आयकॉन” या दोन पुस्तकांचे दिग्गजांच्या हस्ते प्रकाशन*

*ज्येष्ठ व्यंगकवी अशोक नायगावकर, कवी प्रा.अशोक बागवे, वात्रटिकाकार मा.आम. रामदास फुटाणे यांची खास उपस्थिती*

सावंतवाडी :

सावंतवाडीचे सुपुत्र ज्येष्ठ रंगकर्मी, चार दशकांहून जास्त काळ पत्रकारिता करणारे कोकणच्या साहित्यिक, सांस्कृतिक क्षेत्रात आपला आगळा वेगळा ठसा उमटविणारे, मुखातून मालवणी पेरणारे, महाराष्ट्र राज्याच्या तीनपेक्षा जास्त मुख्यमंत्र्याचे माहिती अधिकारी म्हणून काम पाहीलेले अष्टपैलू व्यक्तिमत्त्व श्री. सतीश पाटणकर यांच्या ‘जाऊ तिथे खाऊ’ हे महाराष्ट्रातील विविध प्रांतातील खाद्यसंस्कृतीवर आधारित व “कोकणचे आयकॉन” हे कोकणातील तब्बल ३९ नररत्नांची आगळीवेगळी माहिती देणारे पुस्तक. या दोन्ही पुस्तकांचा प्रकाशन सोहळा महाराष्ट्राला सुपरिचित असणारे व महाराष्ट्राच्या मराठी साहित्य विश्वात ज्यांचं फार मोठं नाव आहे, तब्बल बारा वर्षे घराघरात पोहोचलेल्या “चार दिवस सासूचे” या मालिकेच्या शीर्षक गीतासह जवळपास पंचेचाळीस पुस्तके प्रकाशित असलेले जिल्ह्यातील मसुरे गावचे सुपुत्र ज्येष्ठ कवी प्रा.अशोक बागवे आणि पन्नास वर्षांपूर्वी ‘सामना’ या अजरामर मराठी चित्रपटाची निर्मिती ज्यानी केली ते वात्रटिकाकार जे आपल्या वात्रटिकांच्या माध्यमातून दिवसेंदिवस ऱ्हास होत चाललेल्या सामाजिक आणि राजकीय मुल्यांवर थेट प्रहार करतात असे ज्येष्ठ साहित्यिक माजी आमदार श्री रामदास फुटाणे आणि सामाजिक संवेदनाना आपल्या विनोदी शैलीनी रसिक प्रेक्षकांना खळखळून हसवणारे घराघरात पोहचलेले जेष्ठ व्यंगकवी अशोक नायगावकर या तिन्ही श्रेष्ठ व ज्येष्ठ साहित्यिकांच्या प्रमुख उपस्थितीत व सावंतवाडी संस्थानचे युवराज लखमराजे भोंसले व सिंधुदुर्ग जिल्हा बँकेचे अध्यक्ष मनीष दळवी यांच्या शुभहस्ते हा प्रकाशन सोहळा संपन्न झाला.
महाराष्ट्राचे मुख्यमंत्री. देवेंद्र फडणवीस, उपमुख्यमंत्री अजितदादा पवार व एकनाथ शिंदे यांनी श्री पाटणकर यांना आवर्जून पाठवलेल्या शुभसंदेशाचे वाचन युवा पत्रकार विनायक गांवस यानी केले तर लेखक श्री सतीश पाटणकर यांचा परिचय व दोन्ही पुस्तकांची थोडक्यात माहिती पर्यटन व्यवसायिक महासंघाचे कार्यवाह ॲड.नकुल पार्सेकर यांनी दिली. आपल्या मनोगतात लेखक पाटणकर यांनी आपल्या आतापर्यंतच्या वाटचालीतील संपूर्ण प्रवास आणि या प्रवासात ज्या असंख्य व्यक्तीनी सहकार्य केले आणि प्रेरणा दिली ज्यामुळे हा संपूर्ण प्रवास सुखमय झाला यासाठी कृतज्ञता व्यक्त केली. महाराष्ट्राच्या मुख्यमंत्र्यांनी तातडीची आढावा बैठक आयोजित केल्याने पालकमंत्री श्री नितेश राणे यांना अचानक मुंबईला जावे लागल्याने त्यांच्या वतीने उपस्थित असलेले जिल्हा बॅकेचे अध्यक्ष मनिष दळवी यांनी शुभेच्छा देताना “विद्यमान पालकमंत्री हे रिजल्ट ओरीयंटेड काम करणारे असल्याने हा जिल्हा पर्यटन द्रुष्टीने विकसित करण्यासाठी कालबद्ध कृती आराखडा आखला जाईल आणि त्यासाठी पाटणकरांसारख्या अनुभवी लोकांचे मार्गदर्शन घेतले जाईल असे सुतोवाच करून पाटणकरांचे विशेष कौतुक केले. माजी राज्यमंत्री प्रवीण भोसले, युवराज लखमराजे यांनीही यावेळी शुभेच्छा दिल्या. प्रेस क्लबचे संस्थापक अध्यक्ष सीताराम गावडे यांच्या मालवणी भाषेतील गाऱ्हाणे कोकणच्या गावकारची आठवण करून गेले. व्यासपीठावर उपस्थित तिनही ज्येष्ठ साहित्यिक तसेच युवराज लखमराजे, मनिष दळवी, माजी नगराध्यक्ष बबन साळगावकर, माजी नगराध्यक्षा सौ. श्वेता शिरोडकर, लोकमतचे आवृत्ती प्रमुख महेश सरनाईक, काव्य मैफिलीचे निवेदन करणारे निवेदक व कवी सुधीर चित्ते, ज्यांच्या मुळे ही दोन्ही पुस्तके वेळेत प्रकाशित होवू शकली ते स्वामीराज प्रकाशनचे ज्येष्ठ पत्रकार, प्रकाशक रजनीश राणे, सावंतवाडी पोलीस स्टेशनचे पोलिस निरीक्षक अमोल चव्हाण, पर्यटन महासंघाचे नंदू तारी यांचा पाटणकर कुटुंबियांच्यावतीने हृद्य सत्कार करण्यात आला. कार्यक्रमाला पाटणकर यांच्या सौभाग्यवती सौ. ममता पाटणकर, मुलगा दत्तप्रसाद पाटणकर, जावई ऋषीकेश बेर्डे व सर्व पाटणकर कुटुंबिय, ज्येष्ठ पत्रकार गजानन नाईक, सीताराम गावडे, अभिमन्यू लोंढे, राजू तावडे, राजेश मोंडकर, प्रेस क्लबचे अध्यक्ष अनंत जाधव, तालुका पत्रकार संघाचे अध्यक्ष हरिश्चंद्र पवार, प्रहारचे सचिन रेडकर, विनायक गांवस, दैनिक कोकणसादचे संपादक संदीप देसाई, हर्षवर्धन धारणकर, कोमसाप सावंतवाडी शाखा अध्यक्ष पत्रकार संतोष सावंत, सचिव प्रा. प्रतिभा चव्हाण, सदस्य कवी दीपक पटेकर (दीपी), पर्यटन व्यवसायिक महासंघाचे कार्यवाह नकुल पार्सेकर व पदाधिकारी, पत्रकार संघाचे पदाधिकारी, राणी पार्वतीदेवी हायस्कूलच्या माजी विद्यार्थी संघाचे पदाधिकारी, कोकण मराठी साहित्य परिषद सावंतवाडी शाखेचे पदाधिकारी तसेच सर्व वृत्तपत्र आणि समाज माध्यमांचे प्रतिनिधी व विविध क्षेत्रातील मंडळी मोठ्या संख्येने उपस्थित होती. कार्यक्रमाचे सूत्रसंचालन प्रा.रुपेश पाटील यांनी केले.
कार्यक्रमाच्या दुसऱ्या सत्रात ज्येष्ठ कवी प्रा.अशोक बागवे, वात्रटिकाकार श्री रामदास फुटाणे व कवी श्री अशोक नायगावकर यांच्या काव्य मैफिलीने वेगळीच मजा आणली. काव्य मैफिलीचे बहारदार सूत्रसंचालन करणारे कवी सुधीर चित्ते यांनी आपल्या आगळ्यावेगळ्या शैलीत तिन्ही कविजनांना विचारलेल्या प्रश्नांची उत्तरे हास्याचे कारंजे उडविणारी होती. कवी रामदास फुटाणे यांनी आपल्या मिश्किल वात्रटिकांनी कोटी केल्या. तर कवी अशोक नायगावकर यांनी आपल्या हळुवार शैलीत स्त्री अन् पुरुष यांच्यातील व्यंगांवर बोट ठेवत काढलेल्या चिमट्यांनी हास्याचे कारंजे उडविले. कवी प्रा.अशोक बागवे यांनी आपल्या उंच आवाजात गायलेल्या विररसातील काव्याने अंगावर रोमांच उभे राहिले आणि त्यांच्याच भैरवीने रंगतदार कार्यक्रमाची सांगता झाली.