मतदान जनजागृतीसाठी सावंतवाडी नगरपरिषदेतर्फे बाईक रॅली

अधिकारी कर्मचारी तसेच विविध संघटनांचा सहभाग

सावंतवाडी

विधानसभा सार्वत्रिक निवडणूक २०२४ च्या अनुषंगाने मतदानाची टक्केवारी वाढविण्यासाठी स्वीप कार्यक्रमांतर्गमत विविध मतदार जनजागृती उपक्रम घेण्यात येत आहेत. या पार्श्वभूमीवर सावंतवाडी शहरात नगरपरिषदेमार्फत मतदान जनजागृती आणि प्रबोधनाकरितां विविध ठिकाणी अनेक उपक्रम राबविण्यात येत आहेत.
या उपक्रमांतर्गत नगरपरिषदेमार्फत सेल्फी पॉईंट, हस्ताक्षर मोहिम, रांगोळी प्रदर्शन, मतदान शपथ, आरोग्य विभागाच्या घंटागाडीद्वारे मतदान जागृतीबाबतची गाणी वाजविणे इ. माध्यमातून मोठया प्रमाणावर मतदान होण्याच्या दृष्टीने उपक्रम राबविण्यात येत आहेत. शहरातील जास्तीत जास्त युवा मतदारांमध्ये जनजागृती करण्यासाठी जिमखाना स्विमिंग पुल, बॅडमिंटन हॉल, जिम, शाळा व महाविद्यालये, तसेच शिवउद्यान, बोट क्लब सेल्फी पॉईंट येथे मतदान जागृतीसाठी सेल्फी पॉईंट व मतदार शपथच्या माध्यमातून विशेष मोहिम राबविण्यात आली आहे.

बुधवारी या निमित्ताने सावंतवाडी नगरपरिषदेमार्फत बाईक रॅलीचे आयोजन करण्यात आले होते. सदर बाईक रॅलीस सकाळी ८ वाजता जनरल जगन्नाथराव भोसले स्मृती शिवउदयान येथून मुख्याधिकारी यांच्या हस्ते हिरवा झेंडा दाखवून प्रारंभ झाला. सदर बाईक रॅलीद्वारे शहरातील विविध भागामध्ये फिरुन विधानसभा सार्वत्रिक निवडणूक २०२४ साठी मतदान करण्याचे नागरिकांना आवाहन करण्यात आले. या बाईक रॅलीमध्ये सावंतवाडी नगरपरिषदेचे सर्व अधिकारी व कर्मचारी , रोटरी क्लब, लायन्स क्लब व इतर अशासकीय संस्थाचे पदाधिकारी तसेच शहरातील विविध शासकीय कार्यालयाचे कर्मचारी, सुजाण नागरीक व पत्रकार यांनी सहभाग नोंदविला.
सदर बाईक रॅली संपल्यानंतर जनरल जगन्नाथराव भोसले स्मृती शिवउदयाना समोरील मोकळया जागेत सर्वाना मतदार शपथ देण्यात आली. त्यांनतर मानवी साखळीचे आयोजन करुन सर्वानी विधानसभा सार्वत्रिक निवडणूक २०२४ साठी २० नोव्हेंबर रोजी मतदान करण्याचा संकल्प केला. त्यानंतर मा. मुख्याधिकारी यांचेमार्फत शहरातील नागरिकांनी विधानसभा निवडणूकीसाठी निर्भयपणे मतदान करावे, असे आवाहन करण्यात आले.