*जागतिक साहित्य कला व्यक्तित्व विकास मंचचे सन्माननीय सदस्य कवी बाबा ठाकूर लिखित अप्रतिम काव्यरचना*

*सातबारा….चित्रगुप्ताचा…!!*

जमीनीवरच्या रेघोट्या मोजत

तहसीलदार सातबारा रेखाटतो

आकाशातही त्याचवेळी तुमचा

सातबारा चित्रगुप्त मांडतो..

माझं-माझं करीत जगणा-यांचा

ढगांत…हिशोब मांडला जातो

सारंकांही इथलं संपल्यानंतर

वरती…परतावा द्यावा लागतो..

जमवता-जमवता सारं आयुष्य

पडद्याआड निघून जात

शेवटी जमवलेलं सातबा-यावरचं

दुस-याच्याचं पदरात पडतं..

फोटोवरचा हार वाळताचं

कचेरीत… सातबारा कोरा होतो

वरती… यमाच्या कचेरीत

तुमचा..सातबारा चित्रगुप्त मांडतो

रजिस्ट्रार..सातबारा कोरा करताचं

यम..नव्याने सातबारा भरतो

रेकॉर्ड तुमचा पडताळून

चित्रगुप्त..सातबा-यावर रेघोट्या मारतो

उद्रेकाच्या मुळाशी सातबारा

शेवटी…पदरात पडतं तरी काय?

तुमचा..हिशोब तर मांडला जाणारचं

प्रश्न..सातबा-याचं पुढं होत तरी काय ?

बाबा ठाकूर