*जागतिक साहित्य कला व्यक्तित्व विकास मंचचे सन्माननीय सदस्य तथा संस्थापक अध्यक्ष महाकवी कालिदास प्रतिष्ठान पुणे लेखक कवी वि. ग. सातपुते लिखित अप्रतिम काव्यरचना*

*बकुळगंध*

**********

असे कसे कां कधीतरी

सहज काही विसरता येते

रुतलेल्या त्या भावनांना

कां अलगदी खुडता येते

भावस्पर्शी , शब्दसंवेदना

हृदयांतरात नित्य जागते

छळतो तो तुझाच दुरावा

मन विकल होऊनी जाते

हुरहुरता क्षणक्षण हळवे

घालमेल जीवाचीच होते

जरी सत्य , की दुर्मिळ तू

उमजणेच दुरापास्त होते

वेदनेची जखम ही ओली

मनी संथ पाझरत असते

साक्षी तुझी तीच बकुळी

अजुनही सुगंधा गंधाळते

********************

*रचना क्र. १९१

*#©️ वि.ग.सातपुते.( भावकवी )*

*📞( 9766544908 )*