*जागतिक साहित्य कला व्यक्तित्व विकास मंचच्या सन्माननीय सदस्य ज्येष्ठ लेखिका कवयित्री मंजिरी अनसिंगकर लिखित अप्रतिम अभंगरचना*
भक्तीचा सोहळा
निर्गुण ब्रह्म हो |आले सगुणांत|
पंढरपुरात| भक्तांसाठी ||१||
सावळे सुंदर | लोभस ते मुख |
देते भक्ता सुख | अगणित ||–२
युगायुगे उभा | पंढरी नगरी |
वाट पाहे खरी | भक्तांची हो ||३||
प्रेमाचे गारूड | करी भक्तांवरी|
चाले वारकरी | ओढीने हो ||४||
अपार ती श्रद्धा| अतूट विश्वास|
सोसतसे त्रास| विठू साठी||५||
हरिचा गजर| दुमदुमे वारी|
चंद्रभागे तीरी | भक्त मेळा||६||
विठ्ठल नामात | रंगे तनमन|
नामसंकीर्तन|अखंडीत||७||
टिपेला पोहचे| भक्तीचा सोहळा|
हा एकादशीला | आषाढीच्या||८|
वारी पथावरी |जे जे करी सेवा |
विठ्ठल पहावा |त्यांच्या मध्ये ||९||
दर्शन देतसे | पांडुरंग सर्वांना|
पावे सकलांना| सदोदित ||१०||
मंजिरी मागते| हे पसायदान|
द्यावे समाधान| सकलांना |११||
सौ.मंजिरी अनसिंगकर नागपूर.
