मतदानासाठी जिल्हा प्रशासन सज्ज
मतदारांनी मतदानाचा हक्क बजावण्याचे जिल्हाधिकाऱ्यांचे आवाहन
- मतदारांसाठी प्रतिक्षालय
- गर्दी झाल्यास टोकन पध्दतीचा होणार अवलंब
- वाहन पार्कींग व्यवस्था
सिंधुदुर्गनगरी
लोकसभेच्या सार्वत्रिक निवडणुकीसाठी सिंधुदुर्ग जिल्ह्यात ७ मे रोजी मतदान होणार आहे. सकाळी सात वाजल्यापासून मतदानास प्रारंभ होणार आहे. मतदानासाठी जिल्हा प्रशासनाची तयारी पूर्ण झाली आहे. सिंधुदुर्ग जिल्ह्यातील एकूण ९१८ मतदान केंद्रावर ६ लक्ष ६४ हजार ५६६ मतदार आपला मताधिकार बजावणार आहेत. सायंकाळी सहापर्यंत मतदान होणार असून मतदारांनी मोठ्या संख्‍येने आपल्‍या मतदानाचा हक्क बजावावा, असे आवाहन जिल्हा निवडणूक अधिकारी किशोर तावडे यांनी केले आहे.
जिल्ह्यातील ९१८ मतदान केंद्रावर मतदान पार पडणार आहे. १२७ सेक्टर ऑफिसर आणि पोलिस सेक्टर ऑफिसर मतदानर केंद्रावर कायदा व सुव्यवस्था पाहणार आहेत. ४५९ मतदान केंद्रावर वेब कास्टींगच्या माध्यमातून नजर ठेवल्या जाणार आहे. ९२ मतदान केंद्रावर सुक्ष्म निरीक्षक (Micro Observer) असणार आहेत. जिल्‍हाधिकारी तथा जिल्हा निवडणूक अधिकारी किशोर तावडे यांनी जिल्‍हावाशियांना आवाहन करतांना आपल्‍या संदेशात जनतेने मोठ्या संख्‍येने मतदान केंद्रावर पोहोचावे, अशी विनंती केली आहे. मतदान केंद्रावर उन्‍हापासून बचावासाठी प्रतिक्षालय उभारण्‍यात आली असून पिण्‍याच्‍या पाण्‍यासह आवश्‍यकतेनुसार आरोग्‍य विषयक उपाययोजना करण्यात आल्‍या आहेत. अनेक दिवसांपासून शासकीय यंत्रणा निवडणुकीसाठी कार्यरत असून मंगळवारची सुटी मतदानासाठीच उपयोगात आणा असेही त्यांनी आवाहन केले आहे. उद्या संनियंत्रण कक्षातून जिल्ह्यातील सर्व यंत्रणेवर आपले लक्ष राहणार असून निर्भय होऊन आपला मताधिकार वापरण्‍याचे आवाहनही त्यांनी केले.
सिंधुदुर्ग जिल्ह्यात कायदा व सुव्यवस्था राहावी म्हणून जिल्हा पोलिस अधीक्षक सौरभ कुमार अग्रवाल यांच्या मार्गदर्शनाखाली पोलिस बंदोबस्त तैनात करण्यात आलेला आहे. यामध्ये १७१ पोलिस अधिकारी, २०४२ पोलिस अंमलदार, ८८१ होमगार्ड, सीएपीएफची १ कंपनी , एसआरपीएफच्या ३ कंपन्या, एक क्युआरटी तैनात करण्यात आलेल्या आहेत.
६ लाख ६४ हजार ५६६ मतदार
जिल्ह्यातील कणकवली विधानसभा मतदार संघात एकूण २ लाख २७ हजार ७३५ (पुरूष- १ लाख १२ हजार ८४२, स्त्री १ लाख १४ हजार ८९३), कुडाळ विधानसभा मतदार संघात एकुण २ लाख १२ हजार ३६० (पुरूष १ लाख ५ हजार ९५१ स्त्री १ लाख ६ हजार ४०८, तृतीय पंथी १) सावंतवाडी २ लाख २४ हजार ४७१ (पुरूष १ लाख १२ हजार ७९५ स्त्री १ लाख ११ हजार ६७६) असे एकूण ६ लाख ६४ हजार ५६६ मतदार यावेळी मतदानाचा अधिकार बजावणार आहेत. सावंतवाडी, कुडाळ आणि कणकवली विधानसभा मतदार संघात प्रत्येकी एक असे सखी मतदान केंद्र, युवक मतदान केंद्र, दिव्यांग मतदान केंद्र आणि परदानशीन मतदान केंद्र असणार असल्याचे उपजिल्हा निवडणूक अधिकारी बालाजी शेवाळे यांनी सांगितले.
